Espazos Sonoros

Dez anos de músicas en espazos de interese cultural

 

O conxunto de actividades e concertos que cada ano nos propón Espazos Sonoros convídanos a vivir a riqueza patrimonial espallada polo conxunto do territorio galego, a través dos sentidos e acompañados da fascinación que a música nos provoca. 

Agora que esta iniciativa chega aos dez anos de vida, podemos felicitarnos de que se teña convertido nunha tradición que anima o comezo do outono en Galicia.

Este ciclo naceu como diálogo entre música e patrimonio. Unha década despois, o encontro coa natureza e a descuberta de espazos etnográficos ou antropolóxicos completa unha oferta que constitúe unha porta aberta ao turismo cultural de calidade. 

Espazos Sonoros abre os nosos sentidos cunha proposta variada de actividades en igrexas, mosteiros, castelos, muíños… con rutas guiadas, obradoiros e achegamentos á música desde outros puntos de vista… Todo pensado para favorecer a participación dos distintos públicos atraídos tanto polo sorprendente dos contidos coma dos continentes.

 

Román Rodríguez González

CONSELLEIRO DE CULTURA, EDUCACIÓN E ORDENACIÓN UNIVERSITARIA

Hai dez anos botamos a andar a non demasiado orixinal idea de xuntar música e patrimonio histórico. Pouco sospeitabamos entón que estariamos aquí, falando do que será esta nova edición, dez anos despois. Moitos foron os escenarios improvisados e moitas as experiencias musicais, estéticas e humanas que tivemos a sorte de vivir ao longo de todos estes anos. Espazos Sonoros naceu con apenas catro ideas moi claras, e foi quen de permanecer leal a elas, evolucionando, á vez, en clara simbiose co aquí e o agora, na procura da harmonía e do intercambio cunha parte imprescindible da súa trama: as xentes que de ano en ano, de espazo en espazo, fostes achegando a vosa presenza, consideración e entusiasmo na construción deste proxecto, humilde no material pero ambicioso no artístico e tamén no humano.

Crear, nos tempos que corren, uns espazos non só para o gozo das músicas e das artes, senón tamén para o encontro en avinza e fraternidade cos demais, conscientes da realidade que nos toca vivir, do lugar que ocupamos no mundo e do que podemos achegar desde a perspectiva da globalidade, non é unha evidencia, senón un acerto. Desde a organización deste festival, como axentes culturais, temos por diante unha enorme tarefa e responsabilidade, que debería continuar ao longo de tempo, sexa connosco ou con outras persoas que retomen estas ideas para continuaren a transformalas, para contribuíren a facernos crecer como sociedade. E vós, querido público dos Espazos Sonoros, sodes, neste proceso, unha parte xa imprescindible.

Comezamos, pois, unha nova edición que intentará aportar un graíño de area máis neste labor construtivo, cunha programación que convida novamente a vivir a música desde unha ampla variedade de perspectivas. Unha nova edición que propiciará, sen dúbida, novas e inesquecibles vivencias ao longo do inmensamente rico patrimonio cultural galego. E con esa idea, agardamos con impaciencia estes novos encontros convosco e coa música ao longo dos Espazos Sonoros. 

Belén Bermejo López

DIRECTORA ARTÍSTICA DO FESTIVAL ESPAZOS SONOROS

2012 © CREOWEBS. Diseñamos y creamos